|
حیدر بابایه سلام
﴿ بند ا ﴾
حیدر بابا ایلدیریملار شاخاندا
سئللر ,سولار ,شاقیلدییوب ,آخاندا
قیزلار اونا صف باغلییوب باخاندا
سلام اولسون شوکتوزه ,ائلوزه!
منیم ده بیر آدیم گلسین دیلوزه!
﴿ بند 2 ﴾
حیدر بابا ,کهلیک لرون اوچاندا
کول دیبیننن دوشان قالخیب ,قاچاندا
باغچالارون چیچکله نیپ ,آچاندا
بیزدن ده بیر ممکن اولسا , یادائله !
آچیلمیان اورکلری شاد ائله!
﴿ بند 3﴾
بایرام یئلی چارداقلاری ییخاندا
نوروز گولی, قارچیچه گی چیخاندا
آغ بولوتلار کوینکلرنین سیخاندا
بیزدن ده بیر آد ائله ین ساغ اولسون
درد لر یمیز قوی دیکلسین, داغ اولسون
﴿ بند 4 ﴾
حیدر بابا گون دالیوی داغلاسین !
اوزون گولسون بولاقلارین آغلاسین !
اوشاقلارین بیر دسته گول باغلاسین!
یئل گلنده , وئر گتیر سین بو یانا
بلکه منیم یاتمیش بختیم اویانا
﴿ بند 5 ﴾
حیدر بابا ,سنین اوزون آغ اولسون
دورت بیر یانین بولاق اولسون باغ اولسون
بیزدن سورا سنین باشین ساغ اولسون
دونیا قضو - قدر اولوم ایتیمدی
دونیا بویی اوغولسوز دی , یئتیمدی
﴿ بند 6 ﴾
حیدر بابا یولوم سنن کج اولدی
عومریم گئچدی ,گلنمه دیم گئج اولدی
هیچ بیلمه دیم گوزللرون نئج اولدی
بیلمزیدیم دونگله وار , دونوم وار
ایتگین لیک وار ,ایریلیق وار , اولوم وار
﴿ بند 7﴾
حیدر بابا ایگیت امک ایتیر مز
عومور گئچر ,افسوس بره بیتیرمز
نامرد اولان عومری باش ا یئتیرمز
بیزده ,والله اونوتماریق سیزلری
گورنمه سک حلال ائدون بیزلری
﴿بند 8 ﴾
حیدر بابا " میر اژدر " سسله ننده
کنه ایچینه سسدن , گویدن دوشنده
"عاشیق رستم" سازین ,دیللندیرنده
یادوندادی نه هووله سک قاچاردیم ؟
قوشلار تکین قاناد چالیپ اوچاردیم؟
﴿ بند 9﴾
"شنگیل آوا " یوردی "عاشیق آلماسی "
گاهدان گئدیب , اوردا قوناق قالماسی
داش اتماسی ,آلما – هئیوا سالماسی
قالیب شیرین یوخی کیمی یادیمدا
اثر قویوب رو حوم دا , هر زادیمدا
﴿ بند 10﴾
حیدر بابا " قوری گولون" قازلاری
گدیک لرین سازاق چا لان سازلاری
کت – کوشنین پاییز لاری , یازلاری
بیر سینما پرده سی دور گوزومده
تک اوتوروب سئیر ائده رم اوزومده
﴿بند 11﴾
حیدر بابا "قره چمن" جاداسی
چووشلارین گلر سسی, صداسی
کربلایه گئدنلرین قاداسی
دوشسون بو آج یولسوزلارین گوزونه
تمددنون اویوق یالان سوزونه
﴿بند 12﴾
حیدر بابا شیطان بیزی آزدیریب
محبتی اورکلردن قازدیریب
قره گونون سرنوشتین یازدیریب
سالیب خلقی بیر ,بیرینین جانینا
باریشیغی بلشدیریب قانینا
﴿بند 13﴾
گوز یاشینا باخان اولسا ,قان اخماز
انسان اولان خنجر بئلینه تاخماز
اما حئییف , کور تو تدوغون بوراخماز
بهشتیمیز جهنم اولماقا دور !
ذیحجه میز محرم اولماقدادور!
﴿بند 14﴾
خزان یئلی یارپاقلاری توکنده
بولوت داغدان ائنیب کنده چوکنده
"شیخ الاسلام "گوزل سسین چکنده
نیسگیلی سوز اور کلره ده یه ردی
آغاج لاردا , آللها باش ایه ردی
﴿بند 15﴾
"داشلی بولاق" داش – قومونان دولماسین!
باغچالاری سارالماسین , سولماسین!
اوردا ن گئچن آتلی , سوسو ز اولماسین !
دئینه : بولاق ,خئیرون اولسون , آخارسان
اوفق لره خومار – خومار باخارسان
﴿بند 16﴾
حیدر بابا ,داغین داشین , سره سی
کهلیک اوخور ,دالیسیندا فره سی
قوزولارین , آغی -بوزی ,قره سی
بیر گئدیدیم داغ – دره لر اوزونی
اوخویایدیم :< چوبان قیتیر قوزونی>
﴿بند 17﴾
حیدر بابا ," سولو یئرین" دوزنده
بولا ق قاینار چای , چمنین گوزونده
بولاغ اوتی اوزر سویون اوزونده
گوزل قوشلار اوردان گلیب , گئچللر
خلوتلیوب , بولاقدان سو ایچللر
﴿بند 18﴾
بیچین اوستی , سونبول بیچن اوراقلار
ایله بیل کی , زلفی دارار داراقلار
شکارچیلار بیلدیر چینی سوراقلار
بیچین چیلر ایرانلارین ایچللر
بیر هوش دانیپ , سوندان دوروب , بیچلر
﴿بند 19﴾
حیدر بابا کندین گونی باتاندا
اوشاقلارون شامین یئییپ , یاتاندا
آی بولوتدان چیخیب , قاش – گوز آتاندا
بیدن ده بیر سن اولارا قصه ده
قصه میزده چوخلی غم و غصه ده
﴿ بند 20﴾
قاری ننه گئجه ناغیل دئینده
کولک قالخیب , قاپ –باجانی دوئینده
قورد گئچی نین شنگی سین یئینده
من من قاییدیپ , بیزده اوشاق اولایدیم
بیر گول آچیب , اوندان سورا سولاسدیم
﴿بند 21﴾
عمه جانین بال بلله سین یئیه ردیم
سوندان دوروب , اوس دونومی دئیه ردیم
باغچالاردا تیر ینگه نی دئیه ردیم
آی اوزومی او ازدیرن گونلریم !
آغاج مینیب , آ ت گزدیرن گونلریم !
﴿ بند 22﴾
" هچی خالا" چایدا پالتار یوواردی
"ممد صادق " داملارینی سوواردی
هیچ بیلمزدیک داغدی داشدی , دوواردی
هریان گلدی شیلاق اتیب , آشاردیق
آللاه , نه خوش غمسیز - غمسیز یاشاردیق !
﴿بند 23﴾
" شیخ الاسلام" مناجاتی دئیه ردی
"مشد رحیم " لباده نی گئیه ردی
" مشد آجلی " بوز باشلری یئیه ردی
بیز خوشودوق خیرات اولسون توی اولسون
فراق ائله مز , هر نولاجاق , قوی اولسون
﴿بند 24﴾
"ملک نیاز " ورندلین سالاردی
آتین چاپیپ , قئقاجیدان چالاردی
قرقی تکین گدیک باشین آلاردی
دو لایی یه قیز لاز آچیپ پنجره
پنجره لر ده نه گوزل منظره !
﴿بند 25﴾
حیدر بابا ,کندین تویون توتاندا
قیز – گلینلر ,حنا , پیلته , ساتاندا
بیگ ,گلینه دامدان آلما آتاندا
منیم ده او قیزلاروندا گوزوم وار
عاشیقلارین سازلارین دا سوزوم وار
﴿بند 26﴾
حیدر بابا , بولاقلارین یارپیزی
بوستانلارین گول بسری , قارپیزی
چرچی لرین اغ ناباتی , ساقیزی
ایندی ده وار داماغیمدا ,داد وئره ر
ایتگین گئدن گونلریمدن یاد وئره ر
﴿بند 27﴾
بایرامیدی ,گئجه قوشی اوخوردی
آداخلی قیز , بیگ جورابین توخوردی
هرکس شالین بیر باجادان سوخوری
آی نه گوزل قایدادی شال سالاماق !
بیک شالینا بایراملیغین باغلاماق !
﴿بند 28﴾
شال ایسته دیم منده ائوده اغلادیم
بیر شال آلیب تئز بئلیمه باغلادیم
"غلام "گیله قاشدیم شالی ساللادیم
"فاطمه " خالا منه جوراب باغلادی
"خان ننه می" یادا سالیب , آغلادی
﴿بند 29﴾
حیدر بابا ,"میر ممدین "باغچاسی
باغچالارین تورشا – شیرین آلچاسی
گلین لرین دوزمه لری , تاقچاسی
هی گوزلر گوز لریمین رفینده
خیمه وورار خاطره لر صفینده
﴿بند 30﴾
بایرام اولوب قیزیل پالچیق ازللر
ناقیش ووروب , اوتاقلاری بزللر
طاقچالاردا دوزمه لری دوزللر
قیز – گلینین فندیقچاسی , حناسی
هوسله نر آناسی , قایناناسی
﴿بند 31﴾
باکی چی نین سوزی , سووی , کاغیذی
اینکلرین بولاماسی , آغوزی
چرشنبه نین گیردکانی , مویزی
قیزلار دئیه ر: آتیل ماتیل چرشنبه
آینا تکین بختیم آچیل چرشنبه
﴿بند 32﴾
یومورتانی گویچک , گوللی بویاردیق
چاققیشدیریب سینا الارین سویاردیق
اوینا ماق دان بیرجه مگر دویاردیق ؟
"علی " منه یاشیل آ شیق وئرردی
"ارضا" منه نوروز گولی درردی
﴿بند 33﴾
"نوروز علی " خرمنده ول سووردی
گاهدان ائنیب , کولشلرین کورردی
داغدان دا بیر چوبان ایتی هورردی
اوندا , گوردون اولاغ ایاق ساخلاردی
داغا باخیب , قولاغلارین شاخلاردی
﴿بند 34﴾
آخشام باشی ناخیر چیلار گلنده
قودوخلاری چکیپ , ووراردیق بنده
ناخیر گئچیب , گئدیب , کنده یئتنده
حیوانلاری چیلپاق مینیپ , قوواردیق
سوز چیخسایدی , سینه گریب , سوواردیق
﴿بند 35﴾
یاز گئجه سی چایدا سولار شاریلدار
داش – قیه لر , سئلده آشیب , خاریلدار
قارانلیقدا قوردون گوزی پاریلدار
ایتلر گوردون , قوردی سئچیب , اولاشدی
قوردا گوردون , قالخیب , گدیکدن آشدی
﴿ بند 36﴾
قیش گئجه سی , طوله لرین اوتاغی
کتدی لرین اوتوراغی , یاتاغی
بو خاریدا , یانار اوتون یاناغی
شبچره سی , گیردکانی , ایده سی
کنده باسار گولوب – دانیشماق سسی
﴿ بند 37﴾
"شجاع "خال اوغلونون باکی سوقتی
دامدا قوران سماوری , صحبتی
یادیمدادی شسلی قدی , قامتی
"جونم مگین" تویی دوندی یاس اولدی
"ننه قیزین " بخت آیناسی کاس اولدی
﴿ بند 38﴾
حیدر بابا" ننه قیز " ین گوزلری
"رخشنده "نین شیرین – شیرین سوزلری
ترکی دئدیم , اوخوسونلار اوزلری,
بیلسینر کی آدام گئدر , آد قالار
یاخشی – پیس دن آغیز دار بیر داد قالار
﴿ بند 39﴾
یاز قاباغی گون گونئی دوینده
کند اوشاغی قار گولله سین سوینده
کور کچل لر , داغدا کورک زوینده
منیم روحوم , ایله بیون اوردادور
کهلیک کیمین باتیب, قالیب, قاردا دور
﴿ بند 40﴾
قاری ننه اوزاداندا ایشینی
گون بولوتدا اییرردی تئشینی
قورد قوجالیب , چکدیرنده دیشینی
سوری قالخیب دولائیدا ن آشاردی
بایدالارین سئتی آشیب ,داشاردی
﴿ بند 41 ﴾
"خجه سلطان" عمه دیشین قیساردین
"ملا باقر " عم اوغلی تئز میساردی
تندیر یانیپ توستی ائوی باساردی
چایدانیمیز ارسین اوسته قایناردی
قورور قامیز ساج ایچینده اویناردی
﴿ بند 42﴾
بوستان پوزوپ , گتیردیک اشاغی
دولدوراردیق ائوده تاختا – طاباغی
تندیر لرده پیشیر ردیک , قاباغی
اوزون ئییب , توخمالارین چیتلاردیق
چوخ یئمکدن , لاپ آز قالا چاتلاردیق
﴿ بند 43﴾
"ورزقان " دان آرموت ساتان گلنده
اوشاقلارین سسی دوشردی کنده
بیزده بویاندان ائشیدیب , بیلنده
شیلاق آتیب بیر قیشقیریق سالاردیق
بوغدا وئریب , آرمودلاردان آلاردیق
﴿ بند 44﴾
"میرزا تاغی" نان گئجه گئتد یک چایا
من با خیرام سئلده بوغولموش آیا
بیردن ایشیق دوشدی او تای باغچایا
ای وای ! دئدیک قورد دی قاییتدیق قاشدیق
هئچ بیلمدیک نه وقت کوللو کدن آشدیق
﴿ بند 45﴾
حیدر بابا ,آ غاجلارون اوجالدی
آمما حئییف , جوانلارین قوجالدی
توخلیلارون اریخلاییپ ,آجالدی
کولگه دوندی , گون باتدی , قاش قرلدی
قوردون گوزی قارانلیقدا بوراولدی
﴿ بند 46﴾
ائشیتمیشم یانیر الله چراغی
دایر اولوب مسجد یزون , بولاغی
راحت اولوب کندین ائوی اوشاغی
"منصور خان" ین الی – قولی وار اولسون
هاردا قالسا , آلله اونا یار اولسون
﴿ بند 47﴾
حیدر بابا ," ملا ابراهیم" وار یا یوخ ؟
مکتب آچار , اوخور اوشاقلار یا یوخ؟
خرمن اوستی مکتبی باغلار یا یوخ؟
مندن آخوندا یئتر رسن سلام
ادبلی بیر سلام ما لا مکان
﴿ بند 48﴾
"خجه سلطان" عمه گئدیب تبریزه
امما نه تبریز , که گلنمیر بیزه
بالام , دورون قویاق گئدک ائممیزه
"آقا" اولدی ,توفاقیمیز داغیلدی
قویون اولان , یاد گئدیبین ساغیلدی
﴿ بند 49﴾
حیدر بابا دونیا یالان دونیا یالان دنیا دی
سلیماندان , نوحدان قالان دنیا دی
اوغول دوغان درده سالان دنیا دی
هر کیمسیه هر نه وئریب آلیب دی
افلاطوندان بیر قوری آد قالیبدی
﴿ بند 50﴾
حیدر بابا , یار - یولداشلار دوندیلر
بیر – بیر منی چولده قویوب چوندیلر
چشمه لریم , چیراغلاریم سوندیلر
یامان یئرده گون دوندی آخشام اولدی
دنیا منه خرابه ی شام اولدی
﴿ بند 51﴾
عم اوغلینان گئدن گئجه "قیبچاغا "
آی کی, چیخدی , آتلار گلدی اویناغا
دیر ماشیردیق ,داغدان آشیردیق داغا
"مش ممی" خان گوی آتینی اویاتدی
تفنگینی آشیردی ,شاقیلداتدی
﴿ بند 52﴾
حیدر بابا " قره کولون "دره سی
خشگنابین یولی , بندی, بره سی
اوردا دوشر چیل کهلیگین فره سی
اوردان گئچر یوردوموزون اوزنه
بیزده گئچک یوردوموزون سوزونه
﴿ بند 53﴾
"خشگنابی " یامان گونه کیم سالیب ؟
سید لردن کمیم قیریلیب کیم قالیب؟
آ "میر غفار " دام –داشینی کیم آلیب؟
بلوا گینه گلیب , بلوا گینه گلیب , گولی دولدورور؟
یا قورویوب , باغچالاری سولدرور؟
﴿ بند54﴾
آ"میر غفار" سیدلرین تاجییدن
شاهکار شکار ائتمه سی قیقا جییدی
مرده شیرین ,نامرده چوخ اجییدی
مظلوم لارین حقی اوسته اسردی
ظالم لری قیلیج تکین کسردی
﴿ بند55﴾
"میر مصطفی" دائی اوجا بوی بابا
هیکلی ساققاللی تولستوی بابا
ائیلردی یاس مجلسینی توی بابا
خشگنابین آبروسی, اردمی
مسجد لرین , مجلیسیلرین , گور کمی
﴿ بند56﴾
"مجد السادات " گولردی باغلار کیمی
گورولدردی بولوتلی داغلار کیمی
سوز آغزیندا , اریردی یاغلار کیمی
آلنی آچیق , یاخشی درین قانادردی
یاشیل گوزلر , چیراغ تکین یانار دی
﴿ بند57﴾
منیم آتام سفره لی بیر کیشیدی
ائل الیندن توتماق اونون ایشیدی
گوزللرین آخیره قالمیشیدی
اوندان سورا دونر گه لر دوندیلر
محبتین چراغلاری سوندیلر
﴿ بند58﴾
"میر صالحین " دلی سولوق ائتمه سی
"میر عزیز ین " شیرین شاخسئی گئتمه سی
"میر ممدین "قورولماسی , بیتمه سی
ایندی دئسک ,احوالاتدی ,ناغیلدی
گئچدی , گئتدی, ایتدی, باتدی, داغیلدی
﴿ بند59﴾
"میر عبدولون "آینا قاش یاخماسی
جویلریندن قاشی نین آخماسی
بویلانماسی, دام – دواردان باخماسی
شاه عباسین دوربینی , یادش بخیر !
خشگنابین خوش گونی یادش بخیر!
﴿بند 60﴾
"ستاره عمه"نزیک لری یارپاقلاری
"میر قادر " ده هردن بیرین قاپاردی
قاپیب ,یئییب ,دایچا تکین چاپاردی
گولمه لیدی اونون نزیک قاپباسی
عمه مین ده ارسینی نین شاپباسی
﴿بند61﴾
حیدر بابا آ "میر حیدر "نئله ییر؟
یقین گینه سماوری قئینه ییر
دای قوجالیب ,الت انگینن چئنه ییر
قولاق باتیب ,گوزی گیریب قاشینا
یازیق عمه ,هاوا گلیب باشینا
﴿ بند62﴾
خانم عمه "میر عبدولون "سوزونی
ائشیدنده ایر آغیر – گوزونی
ملیکامده وئر اونون اوزونی
دعوالارین شوخلو غونان قاتاللار
اتی یئییب ,باشی اتیب یاتاللار
﴿ بند63﴾
"فضه خانم "خشگنابین گولییدی
آ"میر یحیی " عمیقیزی نین قولییدی
"رخساره "آرتیستیدی – سوگیلییدی
"سید حسین " "میر صالح" ی یانسیلار
آ"میر جعفر "غیرتلی دور قان سالار
﴿ بند64﴾
سحر تئزدن ناخیر چیلار گلردی
قویون – قوزی دام باجادان ملردی
عمه جانیم کورپه لرین بلردی
تندیرین قووزاناردی توستی سی
چور کلرین گوزل اییی , ایستی سی
﴿ بند65﴾
گویر چیلر , دسته قالخیب , اوچاللار
گون ساچاندا ,قیزیل پرده آچاللار
قیزیل پرده آچیب , ییغیب , قاچاللار
گون اوجالیب , ارتار داغین جلالی
طبیعتین , جوانلار جمالی
﴿ بند66﴾
حیدر بابا قارلی داغلار آشاندا
گئجه ,کروان یولون آزیب,چاشاندا
من هارداسان ,تهراندا, یاکاشاندا
اوزااقلاردان گوزوم سئچر اونلاری
خیال گلیپ آشیپ, گیچر اونلاری
﴿بند 67﴾
بیر چیخایدیم "دام قیه" نین داشینا
بیر باخایدیم گئچمیشینه , یاشینا
بیر گورئیدیم نه لر گلمیش باشینا
من ده اونو قارلاریلان اغلاردیم
قیش دوندوران اورکلری داغلاردیم
﴿بند68﴾
حیدر بابا , گول غنچه سی خنداندی
اما حئییف ,اورک غذاسی قاندی
زندگانلیق بیر قارانلیق زنداندی
بوزندانین دریچه سین ,آچان یوخ
بو دارلیقدان بیر قورتولوب , قاچان یوخ
﴿بند 69﴾
حیدر بابا, گویلر بوتون دوماندی
گویلریمیز بیر بیر یندن یاماندی
بیر – بیرزدن آیریلمایین آماندی
یاغیشلیغی الیمیزدن الیبلار
یاخشی بیزی یامان گونه سالیبلار
﴿بند 70﴾
بیر سوروشون بو قارقینمیش فلکدن
نه ایسته یر بو قوردوغی کلکدن؟
دئنه گئچیرت اولدوزلری الکدن
قوی تو کولسون بو یئر اوزی داغیلسین
بو شیطانلیق قوروقو سی بیر ییغیلسین
﴿بند 71﴾
بیر اوچایدیم بو چیر پینان یئلینن
باغلاشایدیم داغدان آشان سئلینن
آغلاشایدیم اوزاق دوشن ائلینن
بیر گوریدیم آیریلیغی کیم سالدی؟
اولکه میزده کیم قیریلدی , کیم قالدی؟
﴿بند 72﴾
من سنون تک داغا سالدیم نفسی
سنده قایتار , گویلره سال بو سسی
بایقوشوندا دار الماسی قفسی
بوردا بیر شئر قالیب , باغیریر
مروت سیز انسانلاری چاغیریر
﴿بند 73﴾
حیدر بابا, غیرت قانین قاینار کن
قره قوشلار , سندن قوپوب , قالخار کن
اوسیلدیریم داشلارینان اوینار کن
قووزان , منیم همتیمی وارد گور
اوردان اییل , قامتیمی داردا گور
﴿بند74﴾
حیدر بابا , گئجه دورنا گئچنده
"کور اوغلونون" گوزی قارا سئچنده
"قیز آتینی" مینیب, کسیب بیچنده
منده بوردان , تئز مطلبه چاتمارام
"عیوض" گلیب , چارتمایینجا یاتمارام
﴿بند 75﴾
حیدر بابا مرد اوغللار دوغگینان
نامرد لرین بورونلارین اوغگینان
گدیکلرده قوردلاری توت بوغگینان
قوی قوزولار آیین – شایین اوتلاسین
قویونلارون قویر یقلارین قاتلاسین
|
